Во тек на април, „Аг футура технологии“ во соработка со Земјоделскиот факултет при Универзитетот „Гоце Делчев“ во Штип успешно ја спроведе пролетната сеидба на експерименталните полиња предвидени во рамки на проектот „КАРБОНИКА“.

Во втората експериментална година, по есенската сеидба на јачмен продолжува сеидбата на пролетните култури. Согласно со планирањата е извршена сеидба на пченка и сончоглед со примена на препорачани соодветни практики за намалување на емисијата на стакленички гасови во атмосферата, односно практики кои поттикнуваат поголема секвестрација на јаглеродот во почвата. За таа цел пченката е посеана во здружен посев со грав, а кај сончогледот ќе биде вклучен јачмен како покровна култура. Паралелно со практиките за јаглеродно земјоделство, кај истите култури се применети и конвенционалните практики, со цел споредба на резултатите помеѓу различните практики.

Дополнително, според конкретен план, за време на сеидбата беа спроведени и мерења со CARBONICA Toolbox, како концентрацијата на CO₂, температурата и влажноста на почвата, преку кои ќе бидат утврдени резултатите од овие истражувања.

Овие активности се дел од визијата на проектот „КАРБОНИКА“ за промовирање и поддршка на јаглеродното земјоделство како можно решение за одржливо производство и намалување на емисиите на стакленички гасови.