Претставници од Земјоделски факултет учествуваа на Работно-иницијативниот состанок на претставници од науката и бизнисот за претстојната Научно-агробизнис конференција „АГРО МАК 2025“, во рамките на Седмиот меѓународен саем на органски и традиционални производи „Органска трпеза“ и Третиот меѓународен саем за земјоделство, технологии, храна и преработки „АГРО МАК“, кој се одржа во Куманово.
Темата на состанокот беше „Органска и функционална храна - иднината на Македонија и регионот на Југоисточна Европа“.
На работниот состанок учествуваа претставници од факултетите и научни институции од Македонија, Србија, Република Српска, Хрватска, Словенија, Босна и Херцеговина и др., како и компании, земјоделски задруги и земјоделци од споменатите земји.
Свое поздравно обраќање до присутните и благодарност до организаторот, г. Драган Цветковиќ, имаше деканката на Земјоделски факултет при УГД, проф. д-р Емилија Арсов, која го потенцираше значењето на состанокот во рамките на саемските манифестации, каде што спојот меѓу науката и агробизнис секторот уште еднаш ќе го потенцираат значењето на производството на храна, но и ќе се сподели искуство и знаење со колеги од соседните земји за состојбата со производството на храна, како и учеството на младите во производниот процес.
Од работниот состанок, по предлог на проф. д-р Љупчо Михајлов, произлезе иницијатива за организација на конференција која на едно место ќе ги спои науката и агробизнис секторот од областа на органското производство.
Седмиот меѓународен саем на органски и традиционални производи „Органска трпеза“ промовира најквалитетни органски производи и ги поддржува одржливите земјоделски практики.
„АГРО МАК“ е трето издание на Меѓународниот саем за земјоделство, технологии, храна и преработка и модерни технологии за унапредување на земјоделскиот сектор и технологиите за прехранбената индустрија.
Седмиот меѓународен саем на органски и традиционални производи „Органска трпеза“ и третото издание на Меѓународниот саем за земјоделство, технологии, храна и преработка и модерни технологии „АГРО МАК“ се одржаа во периодот од 27 до 29 септември 2024 г.
