На 27.6.2023 г. во Неготино се одржа работилница на тема: „Одржливо производство на иновативни производи од локални сорти на грозје“, организирана од страна на Здружението на енолози од Македонија.
Целта на работилницата беше проширувања на знаењата и искуствата поврзани со производството на вино, алкохолни пијалаци и други производи од грозје од локални сорти. На работилницата се одржаа стручни и научни предавања, надополнети со дегустација на вина, ракии и маџуни произведени од локални сорти на грозје.
На работилницата присуствуваа енолози и други претставници од македонските винарски визби и дестилерии, приватни производители на маџун и регистрирани земјоделци, како и претставници од Земјоделскиот факултет на УГД.
Проф. д-р Виолета Иванова Петропулос одржа две предавања на работилницата на темите: „Предизвици при производство на алкохолни пијалаци“ и „Практична примена на биоактивни компоненти од комиње“.
