Проект „DiverBeans: Одржлива интензификација преку разнообразност на култури за оптимизирање на производството на органски грав во Северна Македонија“ беше реализиран со цел да се тестираат можностите за одгледување органски грав како монокултура и заедно со други култури (сирак, наут, сончоглед) во интеркропинг систем.

Интеркропинг системот на грав и други култури беше тестиран на органски опитни површини во Мустафино и Гевгелија. Проектот, во траење од две години, беше реализиран под водство на Swiss Federal Institute of Technology Zurich и компанијата Coop во соработка со повеќе европски институти и организации. Земјоделскиот факултет во проектот учествуваше како локален партнер во дел од истражувачките активности на терен, со стручна контрола на опитните парцели и вклучување на студентите во собирање на податоци од терен.

Од 26 до 28 април 2022 година беше одржан завршен настан и дисеминација на резултатите од проектот во Струмица и Мустафино, каде локалните партнери и земјоделците беа запознаени со резултатите од проектот и предностите и недостатоците на интеркропинг системот. Покрај тоа, колегите од европските универзитети имаа прилика да видат различни земјоделски системи кои се практикуваат во нашата држава и кои ќе овозможат идна соработка и креирање на нови проекти.