Декан
Проф. д-р Емилија Арсов
Обраќање на деканот
Почитувани наши сегашни и идни студенти,
Чест и задоволство ми е што искрено можам да Ве поздравам и топло да препорачам да бидете дел од нашиот факултет и web просторот – место каде што се сретнуваат знаењето, искуството и визијата за иднината на земјоделството.
Науката отсекогаш била темелот врз кој се гради напредокот. Во контекстот на земјоделството, таа игра клучна улога не само во зголемување на приносите, туку и во заштита на животната средина, рационално користење на ресурсите и обезбедување здрава и безбедна храна за сите граѓани.
Живееме во време на глобални предизвици – климатските промени, деградацијата на почвите, губењето на биодиверзитетот и се поизразената потреба за одржливо производство на храна се реалност која не можеме да ја игнорираме. Токму затоа, денес, повеќе од кога било, науката има клучна улога во трансформацијата на земјоделството – од традиционална економска дејност, во современ систем за грижа кон природата, климата и човековото здравје. Модерната агротехнологија, паметните системи за наводнување, генетски подобрените сорти и интегрираното управување со штетници, се само неколку примери каде науката директно го трансформира земјоделското производство.
Истовремено, земјоделците се нашите партнери во оваа трансформација. Тие не се само производители на храна, туку и чувари на нашата земја, традиција и одржлив развој. Заедно, преку соработка помеѓу научната заедница, земјоделците, институциите и приватниот сектор, можеме да изградиме еден модерен, конкурентен и еколошки одржлив агросектор.
Затоа, нашата задача како научна заедница е не само да истражуваме и анализираме, туку и да пренесуваме знаење, да создадеме јасни препораки и да ги поддржиме политиките што ќе ги поттикнат овие практики. Од друга страна, земјоделскиот сектор има потенцијал да стане клучен партнер во климатската акција – не само како жртва на климатските промени, туку и како дел од решението.
Денес, тука сме да учиме едни од други, да ги споделиме најдобрите практики, и – што е најважно – да создадеме визија за едно одржливо, продуктивно и климатски паметно земјоделство.
Да продолжиме заедно – научно, одговорно и со визија за иднината.